Na Badrudin Yahaya
Timu ya Simba SC, imekata tiketi ya kucheza robo fainali ya michuano ya Mapinduzi Cup baada ya kuibuka na ushindi wa mabao 2-0 dhidi ya Singida Fountain Gate.
Mabao katika mchezo huo yamefungwa kwenye kipindi cha pili na Willy Onana na Luis Miquisonne.
Kwa matokeo hayo, Simba imefikisha alama 6 baada ya kushinda mechi mbili za awali na bado wamebakisha mechi moja dhidi ya APR ambapo wakipata sare watajihakikishia kuongoza Kundi B.
Singida FG ambao nao tayari wameshafuzu robo fainali wao wamemaliza mechi zao zote tatu.
Katika kipindi cha kwanza licha ya timu hizo kutoka bila kufungana lakini nafasi nzuri zilipatikana kwa kila timu.
Simba ilipoteza nafasi muhimu kupitia kwa nahodha wao, John Bocco ambaye aliunasa mpira uliorudishwa nyuma na Kiungo, Morice Chukwu.
Pia Singida FG ilikosa nafasi mbili za kuandika mabao kupitia kwa Habib Kyombo ambaye alipiga kichwa safi kilichookolewa na Kipa, Ally Salim.
Kwa upande mwengine, kinara wa mabao katika michuano hiyo, Mkenya Elvis Rupia, alipata nafasi nzuri ya kufunga lakini shuti lake liligonga mtamba wa panya kisha kuokolewa na walinzi.