WROCLAW, Poland
BONDIA wa uzito wa juu wa Uingereza, Daniel Dubois, anahisi amedanganywa matokeo baada ya pambano lake la ubingwa wa Dunia kumalizika kwa kuchapwa na Oleksandr Usyk wa Ukraine mbele ya mashabiki 40,000 nchini hapa.
Dubois alipanda ulingoni akiwa hapewi nafasi, alimuangusha kiutata mpinzani wake huyo katika raundi ya tano kwa kumpiga pigo la chini.Huku Usyk akiwa chini akiugulia maumivu, mwamuzi alikataa ngumi hiyo ambayo alionekana kutua katika mkanda wa Usyk.
Usyk, 36, alirejea mchezoni na kumtandika Dubois, 25, kwa makonde ya nguvu katika raundi ya nane ulingoni Tarczynski Arena, Wroclaw, kabla ya mwamuzi kumaliza pambano baada ya kuangushwa tena katika raundi ya tisa.
“Sikufikiria kama ngumi ile ni ya kimakosa, nadhani ilimfikia vilivyo,” alisema Dubois baada ya pambano hilo.
Promota wake, Frank Warren amekubaliana na hilo, akisema “ni uamuzi wa nyumbani” wakati akikosoa uamuzi wa Mwamuzi, Luis Pabon na ana mpango wa kukata rufaa.