LONDON, England
KAMPUNI ya Promosheni ya Matchroom, bado inaendelea kutafuta mpinzani atakayezichapa na Anthony Joshua Jumamosi ulingoni London O2 Arena.
Joshua alitakiwa kuzichapa na Dillian Whyte katika pambano la marudiano lakini lilifutwa kutokana na mpinzani wake kukutwa na viashiria vya kutumia dawa zisizotakiwa michezoni.
Hilo limeilazimisha Matchroom kufuta pambano hilo baada ya Chama cha Hiari cha Kupambana na dawa hizo kuthibitisha kwa mapromota na vyama vya ngumi juu ya matokeo hayo.
Hata hivyo, bado kuna matumaini kwa bingwa huyo mara mbili wa Dunia kupanda ulingoni mwishoni mwa wiki wakati wakitafuta mpinzani wa kuzichapa naye.
Bondia mkongwe wa Uingereza, Derek Chisora, anajiandaa kupambana na Mmarekani, Gerald Washington na Filip Hrgovic wa Croatia amepangwa kuzichapa na Demsey McKean katika mapambano ya utangulizi Jumamosi.
Kati ya hao wanne wanaweza kupata nafasi ya kuzichapa na Joshua, wakati mpinzani wake wa zamani akijiondoa katika pambano hilo..