Chalamila ataka PPP kuwa nguzo ya Uchumi Dar

Na Mwandishi Wetu, Dar es Salaam

MKUU wa Mkoa wa Dar es Salaam, Albert Chalamila, ameitaka Halmashauri ya Manispaa ya Kinondoni kutotegemea ukusanyaji wa mapato pekee na badala yake kukumbatia ubia kati ya sekta ya umma na sekta binafsi (PPP’s) na uwekezaji wa hisa katika miradi mikubwa ya maendeleo kuifanya manispaa hiyo kitovu cha utajiri endelevu na ukuaji wa uchumi.

Akizungumza katika kikao cha Baraza la Madiwani la Manispaa ya Kinondoni, Chalamila alisema manispaa hiyo ina uwezo wa kiuchumi ambao utafikiwa endapo kutakuwa na mabadiliko kwenye mbinu za uwekezaji.

Alisema halmashauri inapaswa kubaini miradi itakayotekelezwa kwa kushirikiana na sekta binafsi, huku ikijikita zaidi katika usimamizi na kunufaika na mapato ya muda mrefu.

“Halmashauri haipaswi kubeba gharama zote za uwekezaji wakati inaweza kushirikiana na sekta binafsi na kupata faida kubwa zaidi kwa kutumia rasilimali chache,” alisema Chalamila.

Aliongeza kuwa hata miradi kama Klabu ya Soka ya KMC inaweza kuendeshwa kwa mfumo wa ubia unaohusisha wawekezaji binafsi na wanahisa ili kuongeza ufanisi na kupunguza mzigo wa kifedha kwa halmashauri.

Aidha, Chalamila aliwataka viongozi wa halmashauri kuanza kutumia mtazamo wa kibiashara katika kupanga miradi ya maendeleo kwa kufanya tafiti za kina za uwezekano wa miradi hiyo kutekelezeka, ikiwemo tathmini ya faida ya uwekezaji, muda wa kurejesha mtaji na faida ya muda mrefu.

Alionya dhidi ya kuwekeza miradi isiyoendana na mahitaji ya wananchi, akibainisha baadhi ya masoko yamegeuka kuwa “miradi iliyokufa” kutokana na ukosefu wa maandalizi na tafiti za kutosha kabla ya ujenzi wake.

Mkuu huyo wa Mkoa pia alipendekeza Halmashauri ya Manispaa ya Kinondoni ianze kunufaika moja kwa moja na uwekezaji mkubwa unaofanyika ndani ya eneo lake kupitia umiliki wa hisa, badala ya kutegemea kodi, ada na tozo pekee.

Akitoa mfano wa majengo marefu yanayojengwa Masaki na maeneo mengine ya Kinondoni, Chalamila alisema halmashauri inaweza kumiliki sehemu ndogo ya hisa katika baadhi ya miradi hiyo ili kupata chanzo endelevu cha mapato ya muda mrefu.

Alisema mkakati huo utaimarisha msingi wa kifedha wa manispaa, kuboresha utoaji wa huduma kwa wananchi na kuhakikisha utajiri unaozalishwa ndani ya Kinondoni unawanufaisha wakazi wengi zaidi kupitia uwekezaji wenye tija na ushiriki mkubwa wa sekta binafsi.

IMG-20260704-WA0007-1024x1024 Chalamila ataka PPP kuwa nguzo ya Uchumi Dar

Leave a Reply

Your email address will not be published. Required fields are marked *