Na Mwandishi Wetu, Mtwara
RAIS Dkt. Samia Suluhu Hassan ni kiongozi wa mfano Afrika na duniani anayewafanya Watanzania na wana CCM waone fahari kuongozwa na Rais mwanamke.
Katibu wa NEC, Itikadi na Uenezi wa CCM Taifa, Sophia Mjema, aliyasema hayo jana mkoani Lindi wakati akifunga mafunzo ya falsafa, itikadi na sera za CCM kwa viongozi wa chama, jumuiya zake mkoani humo.
Hitimisho la mafunzo hayo limefanyika katika Wilaya ya Ruangwa, mkoani humo.
Mjema alisema maendeleo makubwa yanayoonekana katika sekta mbalimbali ni kazi kubwa inayofanywa na Mwenyekiti wa CCM Taifa, Rais Dkt. Samia.
Alisema kwa kipindi kifupi cha uongozi wake, Rais Dkt. Samia ameonyesha umahiri na uthubutu katika uongozi ndani na nje ya Taifa la Tanzania.
Akizungumzia umuhimu wa mafunzo, alisema lengo ni kuhakikisha viongozi wanakuwa mfano wa kuigwa kwa kuwa sehemu ya utatuzi wa migogoro na kuleta suluhu kwa kila changamoto inayowakabili wananchi.
“Nendeni mkabadilike na kuwa mfano, kukitumikia chama kwa weledi na uadilifu, kiongozi lazima uwe safi na mfano wa kuigwa.
“Hiki chama ni chama cha wanyonge, kila mtu ana wajibu wa kuwa kiongozi wa mfano mzuri kimaadili kama ilivyo kwa Rais Dkt. Samia,” aliongeza.
Alikemea baadhi ya vitendo vya ukiukwaji maadili vinavyosababisha wananchi kuonewa, kukosa haki.
Mjema alitolea mfano wa migogoro ya ardhi akisema baadhi ya viongozi wamekuwa sehemu ya kukandamiza wanaodhulumiwa ardhi zao.
Aliwasihi viongozi kuwa daraja, kiungo, kuimarisha umoja na mshikamano ili maendeleo yapatikane.