KIEV, Ukraine
BINGWA wa uzito wa juu anayeshikilia mikanda mitatu, Oleksandr Usyk, atatetea mikanda hiyo ya WBO, WBA Super na IBF dhidi ya Daniel Dubois katika pambano litakalofanyika Agosti 26.
Usyk, 36, atalazimika kuzichapa na mpinzani wake wa lazima wa WBA katika Ukumbi wa Tarczynski Arena jijini Wroclaw, Poland ukiwa na uwezo wa kuchukua watazamaji 24,000.
Muingereza Dubois, 25, anashikilia mkanda wa wakawaida wa WBA na atarajia kuboresha rekodi yake ya kushinda mapambano 18 kati ya 19, akipoteza pambano pekee dhidi ya Joe Joyce Novemba, 2020.
Dubois, 25, amesema: “Ni bondia mkubwa na naheshimu hilo lakini kwa sasa ni wakati wangu.
“Nitaenda kuushangaza ulimwengu na kuwaonesha watu wangu jinsi gani Daniel Dubois alivyo bora.”
Usyk ameshinda mapambano yake yote 20 na pambano dhidi ya Dubois litakuwa la pili kutetea mikanda hiyo baada ya pambano lake la mwisho alizichapa na Anthony Joshua Agosti nchini Saudi Arabia.