Ateka mitandao ya kijamii, awapiku wachezaji maarufu
Na Mwandishi Wetu,
New Delhi
ZIARA ya Rais Samia nchini India imetamba katika vyombo vya habari kuanzia magazeti mpaka mitandaoni.
Rais Samia amemaliza ziara ya kitaifa ya siku nne nchini India ambayo imekuja siku chache baada ya taifa hilo kuandaa mkutano wa nchi tajiri duniani wa G20.
Ziara hiyo ilipata umaarufu kiasi kwamba jina la Rais Samia limekuwa namba mbili miongoni mwa majina yaliyosomwa na kutafutwa sana mtandaoni nchini India, kwa mujibu wa mtandao wa Google.
Kulingana na takwimu za Google, Rais Samia ametafutwa zaidi ya mara 100,000, sawa na mchezaji maarufu wa Kriketi nchini India, Baba Azam.
Rais Samia aliwapiku watu maarufu, ikiwa ni pamoja na waigizaji na wacheza mpira duniani.
Kulingana na takwimu hizo za Oktoba 10, 2023, mtu aliyemfuatia ni Amartya Sen ambaye alitafutwa mara 50,000, wakati mchezaji maarufu wa soka, Eden Hazard, alitafutwa mara 20,000 tu.
Habari kubwa zilizoandikwa zaidi na magazeti zilizungumzia kuhusu uhusiano wa kihistoria baina ya nchi hizo na pongezi za Afrika kwa India kutokana na kuipigania kuingia kuwa mwanachama wa G20 kupitia Umoja wa Afrika.