LONDON, England
KOCHA Mauricio Pochettino, amedai Chelsea na Romelu Lukaku, wameshakubaliana kutokuwepo kwa straika huyo katika ziara ya maandalizi ya msimu mpya Marekani.
Lukaku hajaripoti katika Kituo cha mazoezi cha Cobham wakati walipoanza rasmi Julai Mosi na hakuwa katika kikosi cha Chelsea katika safari hiyo.
Straika huyo, 30, wa kimataifa wa Ubelgiji, imekuwa ikiripotiwa kutakiwa kwa udi na uvumba na timu za Juventus na Inter Milan.
“Nafikiri klabu na mchezaji wapo katika nafasi ambayo kila mmoja anaitaka,” amesema Kocha huyo wa Chelsea, Pochettino.
“Nafikiri wakati unapokuwa na aina hii ya uamuzi ni kwasababu wamekubaliana. Nafikiri klabu na mchezaji wanafanya kazi kwa bidii kutafuta njia nzuri ya kulimaliza hili.
“Uamuzi ambao utakuwa umefanywa pia utakuwa umefanywa na mchezaji, tunategemeana katika hili.”
Awali Inter Milan ilisamsajili Lukaku akitokea Manchester United katika msimu wa 2019 kwa uhamisho ulioweka rekodi ya klabu wa pauni milioni 80 kwa mkataba wa miaka mitano.
Baada ya kufunga mabao 64 katika michezo 95 ndani ya misimu miwili, Chelsea ilimrudisha klabuni kwa uhamisho ulioweka rekodi ya klabu kwa pauni milioni 97.5 Agosti, 2021 ikiwa na matarajio atakuwa katika kiwango bora kuliko alichowahi kuwa nacho ndani ya klabu hiyo kati ya mwaka 2011 na 2014 wakati alipofunga mabao 15.