Na Asha Kigundula
BAADA ya kutoka suluhu na Singida Fountain Gate FC, Kocha wa timu ya Prisons, Fred Felix ‘Minziro’, amesema anashukuru kupata alama moja kwani ndio moja ya mipango yake kwa ‘Big 4’ kupata matokeo ya aina hiyo.
Matokeo hayo, yameifanya Prisons kushika nafasi ya tisa kwa alama moja sawa na Singida FC iliyo nafasi ya 10 kwenye Ligi Kuu wakiwa wamecheza mechi moja moja.
Akizungumza baada ya mchezo huo wa jana uliopigwa Uwanja wa Liti mkoani Singida, Minziro amesema mpango wake ni kuhakikisha anafanya vizuri katika michezo ile ya timu nne zilizoshika nafasi ya juu.
“Tulikuwa na nidhamu ya mchezo ndio kitu kikubwa ambacho nimefurahishwa nacho, unapocheza na timu za aina hii, malengo yetu ni kuondoka na hata alama moja kama si zote, najua bado nina kazi kwa timu zingine kama Simba, Yanga na Azam,” amesema Minziro.
Pia ameizungumzia Singida FC kwa kusema ni timu nzuri, imefanya usajili mzuri, wanachezaji vizuri zaidi na ndio maana aliamua kuwaruhusu wacheze mpira katika eneo lao kwanza.