Na Mwandishi Wetu, Kilimanjaro
WAKAZI wa Kijiji cha Makiwaru cha Wilaya ya Siha, Sanya Juu, mkoani hapa, wameoneshwa kufurahi baada ya Kampuni ya Michezo ya Kubashiri ya betPawa kukamilisha mradi wa kisima cha maji safi.
Mradi huo ulikabidhiwa kwa wanakijiji hao jana na Meneja Masoko wa betPawa, Kanda ya Afrika Mashariki, Borah Ndanyungu ambaye alimkabidhi Eric Salema aliyeomba msaada kupitia mpango wa ‘Dream Maker’ wa kampuni hiyo.
Salema alituma maombi kupitia kwa kampuni hiyo kupitia mpango wa betPawa Dream Maker ambao unalenga kusaidia watu kutambua ndoto na matarajio yao yenye manufaa kwao na kwa jamii inayowazunguka ikiwa sehemu ya kurudisha kwa jamii.
Akuzungumza wakati wa hafla ya kukabidhi mradi huo, Ndanyungu alimpongeza Salema kwa kutambua shida ya maji kwa wakazi wa kijiji hicho ambao walikuwa wakitembea umbali mrefu kupata huduma hiyo.
Ndanyungu alisema mradi huo ulichaguliwa kama sehemu ya mpango wa betPawa Dream Maker na kampuni hiyo kutumia sh. milioni 24.4 hadi kukamilika kwake.
“Salema ambaye ni mkulima na mfugaji, ametambua shida ya jamii na kuwa na ndoto za kutatua tatizo hilo na imefanikiwa. Nampongeza kwa kuwa na moyo wa kusaidia watu na kuleta manufaa kwao,” alisema Ndanyungu.
Alisema Kijiji cha Makiwaru na uhaba wa maji ambao umesababisha mifugo kupotea huku akina mama wakisafiri umbali mrefu kufuata huduma hiyo, jambo ambalo lilikuwa kero kwao.
“Tunafurahi kwamba alithubutu kutuma ndoto yake na kutambua mustakabali bora wa kijamii na kiuchumi kwa watu wake kupitia upatikanaji wa maji endelevu. betPawa tunajivunia kufanya kazi na Salema kufanikisha mradi huu,” alisema Ndanyungu.
Alisema kisima hicho chenye urefu wa meta 90 kina uwezo wa kuhudumia wakazi 10,000.
Mradi huo wa kisima hicho unajumuisha pampu inayotumia umeme ambayo itarahisisha kusambaza maji kwa wakazi wa eneo hilo.
Ndanyungu alisema mradi wa Makiwaru ulikuwa mojawapo ya ndoto 20 zilizotekelezwa kama sehemu ya msimu wa pili wa mradi wa Dream Maker wa betPawa. Dream Maker ilianzishwa mnamo 2021 na hadi sasa imepokea zaidi ya maombi 15,000.
Kwa upande wake, Mwakilishi wa kijiji hicho, Mathayo Ngowo na Adela Kimaro, waliishukuru kampuni hiyo kwa kufanikisha mradi huo na kuwaondolea shida hiyo.