MANCHESTER, England
KLABU ya Manchester United, ipo karibu kukamilisha uhamisho wa Kipa wa Inter Milan, Andre Onana kwa pauni milioni 50.
Nyota huyo wa kimataifa wa Cameroon, 27, atachukua mikoba iliyoachwa aliyekuwa kipa namba moja wa timu hiyo, David de Gea, ambaye aliachana na klabu hiyo mwezi uliopita baada ya kuhudumu kwa misimu 12.
Baada ya kikao kilichofanyika mwishoni mwa wiki kati ya United na wawakilishi wa Onana, inaelezwa wamefikia mwafaka kwa kumpa mkataba wa miaka mitano, wenye mipengele cha kuongeza mwaka mmoja zaidi.
Ila mazungumzo kati ya klabu na klabu bado hayajafikiwa.
Lakini inaonekana Onana atakamilisha usajili huo kwa wakati na kujiunga na wachezaji wenzake watakaokuwa kambini nchini Marekani wakati watakapoondoka baadaye wiki hii.
Kocha Erik ten Hag, anamjua vizuri Onana kutokana na kuwa pamoja Ajax na amekuwa na matumaini makubwa naye kwakuwa anaamini ndiye aina ya kipa aliyekuwa akimtaka United tangu alipopewa mikoba hiyo mwaka uliopita.
Onana amehudumu kwa miaka saba na nusu ndani ya Ajax kabla ya kutimkia Inter Julai, mwaka jana.
Hajaruhusu wavu wake kutikiswa mara nane katika mechi 24 za Serie A wakati Inter ikimaliza nafasi ya tatu na pia hajaruhusu bao mara nane katika mechi 13 za Ligi ya Mabingwa Ulaya msimu uliopita, ikiwa ndio kinara kuliko kipa yeyote katika mashindano hayo.